Laus dóu majourau Jan-Marc Courbet (capoulié)

Despièi tres jour me leve pas de la tèsto aqueste image de la Santo-Estello de Sant-Iriès quouro Jan-Marc anounciè sa demissioun de baile dóu Felibrige e qu’en plour se dounerian la brassado.

Li plour vuei recopon que mai davans l’atahut ounte Jan-Marc repauso en pas e, me fau la forço, davans sa maman, soun espouso Silvìo, si fiho e touto sa famiho que salude dins la coumpassioun e l’afecioun, de i’adurre l’oumenage dóu Counsistòri felibren.

Mi paraulo s’endevènon emé li pertoucant message que despièi aièr arribon d’Auvergno, de Gascougno, de Lengadò, de Limousin, de Perigord, de Catalougno peréu e de touto la Prouvènço. Es l’ensèn di terro d’o que te plouron moun car Jan-Marc.

Jan-Marc, despièi la Santo-Estello de Grasso en 1999, pourtè dignamen sus lou pitre la Cigalo de Zani, cigalo que n’èro titulàri aperavans soun ami lou majourau Pèire Millet.

De Jan-Marc, l’ami, talamen avalourave soun sabé, si qualita, que soun acetacioun de deveni Baile dóu Felibrige avié coundiciouna ma decisioun de me presenta au capouleirat.

Ansin sièis an de tèms, a baia d’ande à la founcioun de baile. Coutrìo, en liame tóuti li jour, menerian la barco felibrenco. Sa capacita de travai sèmpre m’espantè. L’escrituro, la reviraduro, la coumunicacioun, li rescontre, li publicacioun, l’ensignamen, l’espandimen èron soun quoutidian.

De-longo a agu de proujèt à jabo. Jan-Marc èro afouga coume res e voulountous coume cènt.

Jan-Marc èro ferme dins sis amiro, Jan-Marc èro un empuraire.

Baiavo l’envejo de sèmpre ana à l’endavans, de crèire à l’aveni, butavo à l’enavans. Jamai descouraja, toujour batènt, Jan-Marc èro l’eisèmple meme dóu devouamen e de l’achinimen.

Perpensan à tout ço qu’a adu is un e is autre, persounalamen o couleitivamen. Soun ajudo, si counsèu èron larg, precious, lis espandissié sènso coumta. Sufisié de ié demanda que que siegue pèr quatecant reçaupre responso. Saberu, d’uno couneissènço inmènso, de tout soun èsse a fa resclanti la bono paraulo mistralenco.

Jan-Marc, tu l’ami de tóuti, tóuti te pourtavon counsideracioun. Vo, Jan-Marc èro ama de tóuti e s’afeciounavo à faire ana li gènt ensèn.

Ome de la counsentido, dóu dialogue, de l’unita, Jan-Marc voulié acampa, voulié counvincre, voulié moubilisa tóuti li forço. Emé counvicioun se dounavo cors e amo pèr faire gagna la grando idèio d’o, pèr fin d’avera la branco dis aucèu.

Vaqui lou resounamen, la bousco, la voulounta, lou soucit permanènt de Jan-Marc, mistralen de la costo pleno.

Jamai mancara un acamp dóu Counsistòri. Ié fasié clanti d’idèio proun senado, sa paraulo i’èro escoutado e apreciado, si poun de visto fasien l’unanimeta.

Mèstre de la lengo, noble servitour de noste ideau, d’esperit counsensuau, óubrié inalassable, estima e respeta, lou Majourau Jan-Marc Courbet, fuguè un moudèle d’envestimen, de labòri, d’annegacioun pregound à la grando Causo d’o.

Entristesi que noun-sai, i’espremissèn deferènci, respèt, recouneissènço.

Moun car Jan-Marc, egrègi majourau, aquel adiéu, salut adoulenti de tout un pople, es lou testimòni de l’amista qu’avèn, tóuti aqui acampa, pèr lou coumpan fidèu e ama qu’a parti de-vers lou sant paradis.

Sèmpre gardaren bello e auto memòri.

A Diéu sias, Majourau devot.

Que Santo-Estello te repause.

Jaque Mouttet

Capoulié dóu Felibrige

—————————–

Óussèqui dóu majourau Jan-Marc Courbet

Coulegiado Sant-Martin

Dimars 8 de nouvèmbre 2016

Bouleno

Cet article, publié dans Actualitats, Felibrige, Laus, Provence, est tagué , , . Ajoutez ce permalien à vos favoris.

Votre commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l’aide de votre compte WordPress.com. Déconnexion /  Changer )

Photo Google

Vous commentez à l’aide de votre compte Google. Déconnexion /  Changer )

Image Twitter

Vous commentez à l’aide de votre compte Twitter. Déconnexion /  Changer )

Photo Facebook

Vous commentez à l’aide de votre compte Facebook. Déconnexion /  Changer )

Connexion à %s